ឋបនីយជីវមណ្ឌលបឹងទន្លេសាបសូមស្វាគមន៍!
បឹងទន្លេសាបគឺជាតំបន់ដីសើមទឹកសាបដែលមានសារៈសំខាន់ខ្លាំងនៅក្នុងតំបន់អាស៊ីអាគ្នេយ៍។ បឹងនេះជាប្រភពទ្រទ្រង់ដល់ប្រជាជនយ៉ាងច្រើន តាមរយៈធនធានជលផលនិងការផ្គត់ផ្គង់ទឹកសាប និងជាជំរកជីវចំរុះសំខាន់ចុងក្រោយគេមួយក្នុងប្រទេសមួយចំនួននៅអាស៊ី។
ឆ្នាំ ១៩៩៧ បឹងទន្លេសាបត្រូវបានកំណត់ជា ឋ.ជ ក្រោមកម្មវិធី អង្គការយូណេស្កូ មួយដែលមានឈ្មោះថាមនុស្សជាតិ និងជីវមណ្ឌល។ ឋ.ជ ដំបូងគេបង្អស់ក្នុងកម្ពុជាគឺ ឋ.ជ.ទ ត្រូវបានបង្កើតជាផ្លូវការ និងអនុម័តដោយ ព្រះរាជក្រិត្យ កាលពីថ្ងៃទី ១០ ខែ មេសា ឆ្នាំ ២០០១។
លេខាធិការដ្ឋានឋបនីយជីវមណ្ឌលបឹងទន្លេសាប ត្រូវបានបង្កើតឡើងដោយ អនុក្រិត្យ ដើម្បីជំរុញដល់កិច្ចសហប្រតិបត្ដិការទំនាក់ទំនង និងផ្លាស់ប្ដូរចំណេះដឹង រវាងស្ថាប័នដែលធ្វើការងារពាក់ព័ន្ឋទៅនឹងជីវមណ្ឌល។
ធនាគារអភិវឌ្ឍន៍អាស៊ី កំពុងផ្ដោតការយកចិត្ដទុកដាក់លើកកំពស់កិច្ចគ្រប់គ្រង និងអភិរក្សធនធានធម្មជាតិនៅអាងទន្លេសាប នៃប្រទេសកម្ពុជា។ ឆ្នាំ ២០០២ ធនាគារអភិវឌ្ឍន៍អាស៊ីបានចាប់ផ្ដើម គំរោងគ្រប់គ្រងបរិស្ថានបឹងទន្លេសាប (គ.គ្រ.ប.ទ) ដែលជាផ្នែកមួយនៃបណ្ដុំគំរោងផ្ដួចផ្ដើមលើទន្លេសាប។ ក្រៅអំពីធនាគារអភិវឌ្ឍន៍អាស៊ី មូលនិធិបរិស្ថានពិភពលោក (ម.ប.ព) និងកម្មវិធីសហសវត្ស ២១ របស់ កម្មវិធីអភិវឌ្ឍន៍អង្គការសហប្រជាជាតិ កំពុងគាំទ្រដល់គំរោងនេះ។
គ.គ្រ.ប.ទ មានគោលបំណងពង្រឹងប្រព័ន្ឋ និងអភិវឌ្ឍសមត្ថភាពសំរាប់ធ្វើការសំរបសំរួល និងធ្វើផែនការគ្រប់គ្រងធនធានធម្មជាតិផ្អែកតាមសហគមន៍ និងការអភិរក្សជីវចំរុះក្នុងឋបនីយជីវមណ្ឌលទន្លេសាប (ឋ.ជ.ទ)។
ប្រព័ន្ឋទិន្នន័យព័ត៌មានបរិស្ថានជីវមណ្ឌលទន្លេសាប (ប្រ.ទ.ប.ជ.ទ) និងវេបសាយឋ.ជ.ទ ត្រូវបានបង្កើតឡើងជាផ្នែកមួយថិតក្រោម គ.គ្រ.ប.ទ ដើម្បីជួយពង្រឹងការសំរបសំរួល និងធ្វើផែនការគ្រប់គ្រងធនធានធម្មជាតិជីវមណ្ឌលទនេ្លសាប ហើយដែលវេបសាយ ឋ.ជ.ទ នេះគឺជាមជ្ឈមណ្ឌលមូលដ្ឋានព័ត៌មានជាផ្លូវការស្ដីពីជីវមណ្ឌលទន្លេសាប។
|
